ໃນ​ໄລຍະ 4 ເດືອນ​ຜ່ານ​ມາ ລັດຖະບານ​ໄດ້​ຈັດ​ຕັ້ງ​ປະຕິບັດ​ວຽກ​ງານ​ຈຸດ​ສຸມ​ຂອງ​ຕົນ ຕາມ​ທີ່​ໄດ້​ສະເໜີ​ກອງ​ປະຊຸມ​ສະໄໝ​ສາມັນ​ເທື່ອ​ທີ 4 ໃນ​ເດືອນ 10 ປີ 2017 ໂດຍ​ໄດ້​ຜັນ​ຂະຫຍາຍ​ມະຕິ​ຂອງ​ສະພາ​ແຫ່ງ​ຊາດ ​ໃນ​ກອງ​ປະຊຸມ​ດັ່ງກ່າວ​ໃຫ້​ເປັນ​ວຽກ​ຕົວ​ຈິງ​ ເຮັດ​ໃຫ້ການ​ຄຸ້ມ​ຄອງ​ລັດ ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ດຳເນີນ​ຕາມ​ຄາດໝາຍ ແລະ ແຜນການ​ທີ່​ວາງ​ໄວ້​ ໂດຍ​ສະເພາະ ຂົງເຂດ​ເສດຖະກິດ​ທີ່​ເຫັນ​ໄດ້​ວ່າ​ມີ​ທ່າ​ອ່ຽງ​ຂະຫຍາຍຕົວ ແລະ ສາມາດ​ຄາດ​ຄະເນ​ໄດ້​ວ່າ: 6 ເດືອນ​ຕົ້ນ​ປີ 2018 ເສດຖະກິດ​ຈະ​ຂະຫຍາຍຕົວ ບັນລຸ​ໃນ​ລະດັບ 6,7%.

ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ລາຍ​ງານ​ກ່ຽວ​ກັບ​ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ແຜນ​ງົບປະມານ​ແຫ່ງ​ລັດ ປະຈຳ 4 ເດືອນ ຄາດ​ຄະເນ​ແຜນ​ປະຕິບັດ 6 ເດືອນ​ທ້າຍ​ປີ ແລະ ທິດ​ທາງ​ວຽກ​ງານ​ຈຸດ​ສຸມ ປະຈຳ 6 ເດືອນ​ທ້າຍ​ປີ 2018 ຂອງ​ລັດ​ຖະບານ​ຕໍ່​ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ​ຊຸດ​ທີ 8 ວ່າ: ການ​ພັດທະນາ​ດ້ານ​ເສດຖະກິດ ໂດຍ​ລວມ​ແມ່ນ​ດຳເນີນ​ໄປ​ຕາມ​ຄາດໝາຍ ແລະ ແຜນການ​ທີ່​ວາງ​ໄວ້ ອີງ​ຕາມ​ຂໍ້​ມູນ​ທີ່​ເກັບ​ກຳ​ໄດ້​ໃນ 4 ເດືອນ ສາມາດ​ຄາດ​ຄະເນ​ການ​ເຕີບ​ໂຕ​ຂອງ​ເສດຖະກິດ​ໃນ​ໄລຍະ 6 ເດືອນ​ຕົ້ນ​ປີ​ຈະ​ບັນລຸ​ຢູ່​ໃນ​ລະດັບ 6,7% ໃນ​ນັ້ນ ຂະແໜງການ​ກະສິກຳ​ຄາດຄະເນ​ຈະ​ເພີ່ມ​ຂຶ້ນ 2,9% ກວມ​ເອົາ 15,9% ຂອງ GDP ຂະແໜງ​ອຸດສາຫະກຳ​ເພີ່ມ​ຂຶ້ນ 7% ກວມ​ເອົາ 31,2% ຂອງ GDP ຂະແໜງ​ບໍລິການ​ເພີ່ມ​ຂຶ້ນ 7,9% ກວມ​ເອົາ 41,7% ຂອງ GDP ພາສີ​ຈາກ​ການ​ນຳ​ເຂົ້າ​ເພີ່ມ​ຂຶ້ນ 6,8% ກວມ 11,2% ຂອງ GDP ແລະ ຄິດໄລ່​ມູນ​ຄ່າ​ຕາມ​ລາຄາ​ໃນ​ແຕ່​ລະ​ປີ ໄດ້​ປະມານ 152.436 ຕື້​ກີບ ຄາດ​ຄະເນ​ສະເລ່ຍ​ຕໍ່​ຫົວ​ຄົນແມ່ນ 2.609 ໂດ​ລາ​ສະຫະລັດ ຫຼື ປະມານ 20,8 ລ້ານ​ກີບ.

ການ​ເກັບ​ລາຍ​ຮັບ-ລາຍ​ຈ່າຍ ​ງົບປະມານລາຍ​ຮັບ​ຈະ​ຈັດ​ຕັ້ງ​ປະຕິບັດ​ໄດ້ 12.084 ຕື້​ກີບ ເທົ່າ​ກັບ 95,9% ຂອງ​ແຜນການ ຫຼື ເທົ່າ​ກັບ 47,48% ຂອງ​ແຜນການ​ປີ ແລະ ລາຍ​ຈ່າຍ​ປະຕິບັດ​ໄດ້ 15.731 ຕື້​ກີບ ເທົ່າ​ກັບ 95,4% ຫຼື ເທົ່າ​ກັບ 45,95% ຂອງ​ແຜນການ​ປີ ໃນ​ໄລຍະ 6 ເດືອນ​ຜ່ານ​ມາ ເຖິງ​ວ່າ​ຈະ​ມີ​ຄວາມ​ຫຍຸ້ງຍາກ​ດ້ານ​ງົບປະມານ ແຕ່​ລັດຖະບານ​ກໍ່​ໄດ້​ເອົາໃຈໃສ່​ແກ້​ໄຂ​ບັນຫາ​ໜີ້​ສິນ​ທີ່​ສະ​ສົມ​ດ້ວຍ​ຮູບ​ການ​ຕ່າງໆ ເພື່ອ​ກະ​ຕຸ້ນ​ເສດຖະກິດ​ໃຫ້​ມີ​ການ​ຂະຫຍາຍຕົວ​ກວ່າ​ເກົ່າ ໃນ​ນັ້ນ​ຈະ​ໄດ້​ຈັດ​ສັນ​ງົບປະມານ​ຊຳລະ​ໜີ້​ສິນ (ບ້ວງ​ປົກກະຕິ) ໃຫ້ 1.831 ໂຄງການ ມູນ​ຄ່າ 529,76 ຕື້​ກີບ (ຍັງ​ຄ້າງ​ຊຳລະ​ຕາມ​ວຽກ​ສຳເລັດ 6.513 ຕື້​ກີບ) ພ້ອມ​ກັນ​ນີ້ ກໍ່​ໄດ້​ແກ້​ໄຂ​ໜີ້​ສິນ​ການ​ລົງທຶນ​ຂອງ​ລັດ​ດ້ວຍ​ຮູບ​ແບບ​ອວ່າຍ​ໜີ້ 3 ແຈ ຈຳນວນ 3.250 ຕື້​ກີບ.

 

ອ້າງອີງ: Vientianemai