ໃນ​ໂອກາດ​ຢ້ຽມຢາມ ສປ ຈີນ ວັນ​ທີ 30 ພຶດສະພາ 2018 ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ປະທານ​ປະເທດ ໄດ້​ພົບ​ປະ​ເຮັດ​ວຽກ​ກັບ​ສະຫາຍ ສີ ຈິ້ນ​ຜິງ ເລຂາທິການ​ໃຫຍ່ ປະທານ​ປະເທດ ແຫ່ງ ສປ ຈີນ ທັງ​ສອງ​ຝ່າຍ​ໄດ້​ເປັນ​ເອກະ​ພາບ​ກັນ​ໃນ​ການ​ຊຸກຍູ້ ການ​ສ້າງ​ຄູ່​ຮ່ວມ​ຊາຕາກຳ​ສັງຄົມ​ນິຍົມ​ໃຫ້​ມີ​ໝາກຜົນ​ອັນ​ໃໝ່ ເພື່ອ​ສ້າງ​ຄວາມ​ຜາ​ສຸກ​ໃຫ້​ແກ່​ປະຊາຊົນ​ສອງ​ຊາດ ລາວ-ຈີນ.

ການ​ພົບ​ປະ ສະຫາຍ ສີ ຈິ້ນ​ຜິງ ໄດ້​ຕີ​ລາຄາ​ສູງ​ຕໍ່​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ສູງ​ຂອງ​ສອງ​ພັກ ສອງ​ປະເທດ ເຊິ່ງ​ສອງ​ຝ່າຍ​ໄດ້​ເປັນ​ເອກະ​ພາບ​ກັນ​ໃນ​ຫຼາຍ​ເນື້ອ​ໃນ ແລະ ປັດຈຸບັນ​ພວມ​ໄດ້​ຈັດ​ຕັ້ງ​ປະຕິບັດ​ຢ່າງ​ຕັ້ງໜ້າ ແລະ ມີ​ປະ​ສິດທິ​ຜົນ ນຳ​ເອົາ​ໝາກຜົນ​ຕົວ​ຈິງ​ມາສູ່​ປະຊາຊົນ​ສອງ​ຊາດ​ຢ່າງ​ແທ້​ຈິງ ສະຫາຍ​ໄດ້​ເນັ້ນ​ໜັກ​ວ່າ​ໃນ​ປີ 2013 ​ສປ ຈີນ ໄດ້​ສະເໜີ​ອອກ​ກ່ຽວ​ກັບ​ການ​ພົວພັນ​ລາວ-ຈີນ ແມ່ນ​ຄູ່​ຮ່ວມ​ຊາຕາກຳ​ທີ່​ມີ​ຜົນ​ປະໂຫຍດ​ກວ້າງຂວາງ​ຮ່ວມ​ກັນ​ເປັນ​ຄັ້ງ​ທຳ​ອິດ ແລະ ໄດ້​ຮັບ​ການ​ສະໜັບສະໜູນ​ຈາກ​ຝ່າຍ​ລາວ.

ປະເທດ​ໄດ້​ເປັນ​ເອກະ​ພາບ​ຮ່ວມ​ກັນ ​ໃນ​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ທີ່​ມີ​ຄວາມ​ໝາຍ​ຍຸດ​ທະ​ສາດ​ລະຫວ່າງ 2 ປະເທດ​ລາວ-ຈີນ ແລະ ໄດ້​ລະບຸ​ເນື້ອ​ໃນ​ດັ່ງກ່າວ​ເຂົ້າ​ໃນ​ຖະແຫຼງການ​ຮ່ວມ​ຂອງ​ສອງ​ປະເທດ​ໃນ​ປີ 2016 ເຊິ່ງ​ໄດ້​ສະແດງ​ໃຫ້​ເຫັນ​ເຖິງ​ບົດບາດ​ສຳຄັນ​ ໃນ​ການ​ນຳ​ເອົາ​ການ​ພົວພັນ​ລະຫວ່າງ​ສອງ​ພັກ​ສອງ​ລັດ ​ກ້າວ​ເຂົ້າ​ສູ່​ໄລຍະ​ທີ່​ດີ​ທີ່​ສຸດ​ໃນ​ປະຫວັດສາດ​ການ​ພົວພັນ​ລະຫວ່າງ​ສອງ​ປະເທດ.

ສະຫາຍ ສີ​ຈິ້ນ​ຜິງ ເນັ້ນ​ໜັກ​ວ່າ​ໄປ​ຄຽງ​ຄູ່​ກັບ​ສາຍ​ພົວພັນ​ລາວ-ຈີນ​ ທີ່​ໄດ້​ກ້າວ​ເຂົ້າ​ສູ່​ໄລຍະ​ການ​ພັດທະນາ​ອັນ​ໃໝ່ ທັງ​ສອງ​ຝ່າຍ​ຄວນ​ຮັດ​ແໜ້ນ​ພື້ນຖານ​ຄວາມ​ຮັບ​ຮູ້​ກ່ຽວ​ກັບ​ຄູ່​ຮ່ວມ​ຊາຕາກຳ ສຸມ​ໃສ່​ການ​ສ້າງ​ປະຊາ​ຄົມ​ຮ່ວມ​ຊາຕາກຳ ຊຸກຍູ້​ເຮັດ​ໃຫ້​ເນື້ອ​ໃນ​ດັ່ງກ່າວ​ກາຍເປັນ​ການ​ກະທຳ ເຮັດ​ໃຫ້​ຄວາມ​ມຸ້ງ​ມາດ​ປາຖະໜາ​ກາຍເປັນ​ຕົວ​ຈິງ ເຮັດ​ໃຫ້​ຄູ່​ຮ່ວມ​ຊາຕາກຳ​ຈີນ-ລາວ ເກີດ​ດອກ​ອອກ​ຜົນ​ເຊິ່ງ​ມີ​ເນື້ອ​ໃນ​ສຳຄັນ​ຄື: ຕ້ອງ​ໄດ້​ເພີ່ມ​ທະວີ​ການ​ປະສານ​ງານ​ດ້ານ​ຍຸດ​ທະ​ສາດ ຮັດ​ແໜ້ນ​ພື້ນຖານ​ການເມືອງ​ຄູ່​ຮ່ວມ​ຊາຕາກຳ ທັງ​ສອງ​ຝ່າຍ​ຄວນ​ມີ​ການ​ແລກປ່ຽນ​ຢ່າງຮອບດ້ານ​ຫຼາຍ​ລະດັບ ແລະ ເປັນ​ກົນ​ໄກ​ເພື່ອ​ຍົກ​ສູງ​ລະດັບ​ຄວາມ​ເຊື່ອ​ໝັ້ນ​ເຊິ່ງ​ກັນ​ ແລະ ກັນ ຕ້ອງ​ໄດ້​ລົງ​ເລິກ​ຮ່ວມ​ມື​ໃຫ້​ເປັນ​ຮູບ​ປະ​ທຳ ຮັດ​ແໜ້ນ​ສາຍ​ພົວພັນ​ດ້ານ​ຜົນ​ປະໂຫຍດ​ຮ່ວມ​ກັນ ສອງ​ຝ່າຍ​ຄວນ​ສຸມ​ໃສ່​ຊຸກຍູ້​ການ​ຮ່ວມ​ມື​ໃນ​ໂຄງການ​ທີ່​ສຳຄັນ​ໃນ​ຂອບ “ໜຶ່ງ​ແລວ​ໜຶ່ງ​ເສັ້ນທາງ” ເພີ່ມ​ທະວີ​ການ​ຮ່ວມ​ມື​ໃນ​ການ​ປັບປຸງ​ຊີວິດ​ການ​ເປັນ​ຢູ່​ ແລະ ການ​ແກ້​ໄຂ​ຄວາມທຸກ​ຍາກ​ ໃຫ້​ແກ່​ປະຊາຊົນ​ສອງ​ປະເທດ​ນັບ​ແຕ່​ເທິງ​ລົງ​ລຸ່ມ​ເຮັດ​ໄປ​ພ້ອມ​ກັນ ແລະ ເຮັດ​ໃຫ້ການ​ຮ່ວມ​ມື​ສອງ​ຝ່າຍ​ມີ​ໂສມ​ໜ້າ​ອັນ​ໃໝ່.

ສະຫາຍ ບຸນ​ຍັງ ວໍລະ​ຈິດ ກ່າວ​ວ່າ: ສະຫາຍ ສີ​ຈິ້ນ​ຜິງ ແມ່ນ​ເພື່ອນ​ມິດ​ຜູ້​ທີ່​ສະໜິດສະໜົມ ແລະ ໄວ້​ເນື້ອ​ເຊື່ອ​ໃຈ​ຂອງ​ພັກ​ລັດ ແລະ ປະຊາຊົນ​ລາວ​ ໃນ​ໂອກາດ​ຢ້ຽມຢາມ​ລາວ​ສະຫາຍ ສີ​ຈິ້ນ​ຜິງ ​ແລະ ການ​ນຳ​ຂັ້ນ​ສູງ​ຂອງ​ລາວ ​ໄດ້​ເປັນ​ເອກະ​ພາບ​ຮ່ວມ​ກັນ​ໃນ​ຫຼາຍ​ບັນຫາ ​ເຊິ່ງ​ພວມ​ໄດ້​ຮັບ​ການຈັດຕັ້ງ​ປະຕິບັດ​ຢ່າງ​ຕັ້ງໜ້າ ແລະ ຮອບດ້ານ​ເຊິ່ງ​ເປັນ​ການ​ນຳ​ເອົາ​ການ​ພົວພັນ​ລະຫວ່າງ​ສອງ​ພັກ​ສອງ​ລັດ ​ໃຫ້​ກ້າວ​ສູ່​ລະດັບ​ສູງ​ອັນ​ໃໝ່ ສະຫາຍ ບຸນ​ຍັງ ວໍລະ​ຈິດ ໄດ້​ສະແດງ​ຄວາມ​ເປັນ​ເອກະ​ພາບ​ກັບ​ສະຫາຍ ສີ​ຈິ້ນ​ຜິງ ໃນ​ການ​ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ ລາວ-ຈີນ ພ້ອມ​ທັງ​ຍິນ​ດີ​ຈະ​ເສີມ​ຂະຫຍາຍ​ບົດບາດນຳ​ພາ​ດ້ານ​ການເມືອງ​ລະຫວ່າງ​ສອງ​ພັກ ໂດຍ​ສືບຕໍ່​ຮັກສາ​ການ​ພົບ​ປະ​ຂອງ​ການ​ນຳ​ຂັ້ນ​ສູງ​ຂອງ​ສອງ​ພັກ ເພີ່ມ​ທະວີ​ການ​ພົວພັນ​ແລກປ່ຽນ​ບົດຮຽນ​ໃນ​ການ​ກໍ່ສ້າງ​ພັກ ການ​ປົກຄອງ​ລັດ​ບໍລິຫານ​ປະເທດ ແລະ ການ​ຮ່ວມ​ມື​ໃຫ້​ເປັນ​ຮູບ​ປະ​ທຳ​ໃນ​ຂົງເຂດ​ຕ່າງໆ ​ຊຸກຍູ້​ການ​ຮ່ວມ​ມື​ໃນ​ໂຄງການ​ທີ່ຢູ່​ໃນ​ຂອບ​ການ​ຮ່ວມ​ມື “ໜຶ່ງ​ແລວ​ໜຶ່ງ​ເສັ້ນທາງ’’ ມີ​ການ​ປະສານ​ງານ​ກັນ​ຢ່າງ​ໃກ້ຊິດ​ໃນ​ກິດຈະການ​ພາກ​ພື້ນ ແລະ ສາກົນ ຮ່ວມ​ກັນ​ສ້າງ​ເປັນ​ປະຊາ​ຄົມ​ຮ່ວມ​ຊາຕາກຳ​ສັງຄົມ​ນິຍົມ ​ທີ່​ບໍ່​ສາມາດ​ທັບ​ມ້າງ​ໄດ້ ເພື່ອ​ສ້າງ​ຄວາມ​ຜາ​ສຸກ​ໃຫ້​ແກ່​ປະຊາຊົນ​ສອງ​ຊາດ.

ສອງ​ຝ່າຍ​ຍັງ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະພາບ​ການ​ກໍ່ສ້າງ​ພັກ ແລະ ສະພາບ​ການ​ພາຍ​ໃນ​ຂອງ​ແຕ່​ລະ​ຝ່າຍ ສະຫາຍ ສີ​ຈິ້ນ​ຜິງ ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ອັນ​ໃໝ່​ຂອງ​ພັກ​ປະຊາຊົນ​ປະຕິວັດ​ລາວ ອັນ​ມີ ສະຫາຍ ບຸນ​ຍັງ ວໍລະ​ຈິດ ເປັນ​ຜູ້ນຳ​ໜ້າ ເຮັດ​ໃຫ້​ປະຊາຊົນ​ລາວ​ສາມາດ​ຍາດ​ມາ​ໄດ້​ຜົນສຳເລັດ​ຫຼາຍ​ດ້ານ ​ໃນ​ການ​ພັດທະນາ​ປະເທດ​ຂອງ​ຕົນ ພ້ອມ​ທັງ​ໄດ້​ແຈ້ງ​ໃຫ້​ຊາບ​ກ່ຽວ​ກັບ​ຜົນສຳເລັດ ແລະ ບົດຮຽນ​ໃນ​ການ​ປະຕິ​ຮູບ ແລະ ເປີດ​ປະຕູ​ສູ່​ພາຍ​ນອກ​ຂອງ​ຈີນ ໄດ້​ເນັ້ນ​ໜັກ​ວ່າ​ຝ່າຍ​ຈີນ​ຈະ​ສືບຕໍ່​ຈັດ​ຕັ້ງ​ວຽກ​ງານ​ດັ່ງກ່າວ​ຢ່າງ​ຕັ້ງໜ້າ​ ຊຸກຍູ້​ການ​ເປີດ​ກວ້າງ​ຕໍ່​ພາຍ​ນອກ​ໃຫ້​ຂຶ້ນ​ສູ່​ລະດັບ​ສູງ​ກວ່າ​ເກົ່າ ເພື່ອ​ເປັນ​ການ​ປະກອບສ່ວນ​ກວ່າ​ເກົ່າ​ເຂົ້າ​ໃນ​ການ​ພັດທະນາ ແລະ ຄວາມ​ຈະເລີນ​ຮຸ່ງເຮືອງ​ຂອງ​ອາຊີ ແລະ ທົ່ວ​ໂລກ​ໃຫ້​ຫຼາຍ​ຂຶ້ນ​ຕື່່ມ.

ສະຫາຍ ບຸນ​ຍັງ ວໍລະ​ຈິດ ໄດ້​ເນັ້ນ​ໜັກ​ວ່າ ພາຍ​ໃຕ້​ການ​ນຳພາ​ອັນ​ສະຫຼາດ​ສ່ອງ​ໃສ ແລະ ຖືກຕ້ອງຂອງ​ພັກ​ກອມ​ມູ​ນິດ​ຈີນ​ອັນ​ມີ​ສະຫາຍ ສີ​ຈິ້ນ​ຜິງ ເປັນ​ແກນ​ນຳ​ນັ້ນ​ໄດ້​ເຮັດ​ໃຫ້​ເສດຖະກິດ​ຂອງ​ຈີນ​ ມີ​ການ​ຂະຫຍາຍຕົວ​ຢ່າງ​ວ່ອງໄວ​ໜັກ​ແໜ້ນ ສັງຄົມ​ມີ​ຄວາມ​ກົມກຽວ​ປອງ​ດອງ ພາລະກິດ​ການ​ປະຕິ​ຮູບ​ເປີດ​ປະຕູ​ສູ່​ພາຍ​ນອກ ແລະ ຂະ​ບວນ​ການ​ສ້າງ​ສັງຄົມ​ອີ່ມ​ໜຳ​ສຳລານ​ຮອບດ້ານ​ ນັບ​ມື້​ມີ​ຜົນສຳເລັດ​ອັນ​ໃໝ່ ໄດ້​ປະກອບສ່ວນ​ທີ່​ສຳຄັນ​ເຂົ້າ​ໃນ​ການ​ແກ້​ໄຂ​ກິດຈະການ​ສາກົນ ແລະ ພາກ​ພື້ນ​ລວມ​ທັງ​ປະກອບສ່ວນ​ເຂົ້າ​ໃນ​ການ​ປົກ​ປັກ​ຮັກສາ​ສັນຕິພາບ ແລະ ການ​ພັດທະນາ​ຂອງ​ອາຊີ​ຕາເວັນ​ອອກ ແລະ ຂອງ​ໂລກ ຝ່າຍ​ລາວ​ຍັງ​ໄດ້​ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ຕໍ່​ຝ່າຍ​ຈີນ ​ທີ່​ໄດ້​ໃຫ້ການ​ສະໜັບສະໜູນ​ຊ່ວຍເຫຼືອ​ອັນ​ລ້ຳ​ຄ່າ​ມາ​ໂດຍ​ຕະຫຼອດ.

ພາຍຫຼັງ​ການ​ພົບ​ປະການ​ນຳ​ສອງ​ປະເທດ​ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ ​ໃນ​ພິທີ​ເຊັນ​ເອກະສານ​ສັນຍາ​ຮ່ວມ​ມື​ທີ່​ກ່ຽວຂ້ອງ ​ໂດຍ​ມີ​ການ​ນຳ​ຂັ້ນ​ສູງ​ຂອງ​ສອງ​ຝ່າຍ​ເຂົ້າ​ຮ່ວມ.

ອ້າງອີງ ວຽງຈັນໃໝ່